Wat komp der nao de Toorn van Thunaer?

Nieuws

Net as zo veul mensen loopt wij zo non en dan nog ies op de Klencke langs de Boksloot, met zicht op het tolhoes, dat in 2019 fungeerde as burcht van heer Harmannus ter Klencke…. Zullen kerels van Hazarman de Hellige nog achter in de bos toeholden? Wij zit dan even op “oes” bankie en laot de herinnerings weer binnenkommen….. Zul der ooit weer zowat maakt worden kunnen?

Zeker Wal!!

Starker nog, hiel langzaam ontstiet er een verhaal waor wij over een paar jaor weer wat groots en moois van maken kunt. Een hiel aander verhaal dan dat van de Toorn. Op een hiel aandere locatie ok, want op een herhaling van zetten zit gien mèens te wachten en wij wilt natuurlijk gebruuk maken van oes prachtige Drèentse landschap, maar het verhaal en de muziek moet origineel wezen. Van dizze tied, ok al speult het diels misschien wal in hiel aandere tieden….
Het möt fantasieriek wezen, kleurriek, spannend, maar ok vrolijk en ontroerend en met een portie humor.
Het möt zo worden, dat elk der met al zien talenten an metdoen wil, zodat het weer een onvergetelijke, gezamenlijke, unieke, muzikale productie wordt waor nog lang over naoproot wordt. Oh, het idee um weer met hiel veul mensen tegeliek te kunnen zingen, dansen en acteren…… en dat er dan gien corona meer is……
Het zit allemaol nog in de pen. Het is nog prematuur…maar…as het een prille zwangerschap was, dan zul de test positief wezen. Een plussie! Het begun is er. Wordt vervolgd….

Februari 2021,

Gerrit, Jan, Harm