‘Het was een enorme puzzel’ stiet te lezen in een brief die de dielnimmers an theaterspektakel De Vlinderprinses eind september kregen hebt. Naor verluidt bint schriever en regisseur Harm Dijkstra en arrangeur en dirigent Jan Kruimink nao alle auditiedagen twee dagen zuut west um die puzzel te leggen. Maor dan is ’t ok klaor. Nou ja… haost alle rollen bint verdield, een enkele wordt later nog invuld.
De overgrote meerderheid van de 150 dielnimmers wet nou zo’n beetie wat of hum of heur te doen stiet. Het koor vörmt, samen met muziekveriening Excelsior, de ruggegraot van het stuk. Dus iederien giet zingen, net as dat bij De Toorn van Thunaer gebeurde. Ok bint der weer solozangers en kleinere ensembles. Een diel daorvan is ok al bekend.
De eerste versie van het script is nou te lezen veur de dielnimmers. En vanzölf blef dat geheim veur iederien die niet metan döt. Dat De Vlinderprinses een Zweeler verhaal is, was al terug te zien in de anmeldingen: der bint meer dielnimmers oet Zweel en umgeving as bij De Toorn van Thunaer, maor daornaost doet der ok speulers en zangers oet bijveurbeeld Börk, Oring, Beilen, Raol en Nei-Amsterdam met.
Ervaren acteurs
Een klein tippie van de sluier? Josh Hassing, in het daogelijks leven kapper in Oring, hef ien van de prominente rollen te pakken. Hassing is een ervaren acteur en tenielschriever, die jaorenlang de Musicalgroep Odoorn leid hef. Hij maakte met die groep succesvolle veurstellingen as Een Ander Achterhuis en De Opgejaagden. Hassing har ok rollen in under meer So Many Roads, het theaterstuk over Harry Muskee en Het ontzet van Coevorden.
Sem Donkers (16) oet Coevern was ok te zien in So Many Roads en hij döt nou ok met an De Vlinderprinses. Wieder is der een belangrieke rol veur de jonge musicalactrice Jozefien de Lange oet Möppen. De 23-jaorige professionele actrice was dit jaor te zien in het theaterspektakel De vergeten Twentse Lente en veurig jaor in de musical Amerika Amerika.
‘Bekende gezichten’
Wieder bint der speulers die ok met De Toorn van Thunaer metdaon hebt, zoas Jeroen Rienties oet Daoln, Robert Braam oet Hesseln en Diddy ter Heide oet Slien. Wat veur rollen der allemaol bint? Daorover later ungetwiefeld meer… Begun 2024 start de rippetities.
Tekst: Annemiek Meijer