“Joehoe, bei Drenten koj toch aaltied achterum?”. Zo begunt de ofspraak met Miriam ter Weeme. Miriam (51) woont in Schonnerd an de Ringstraot. Nao even zuken, bel ik an bei de veurdeur. Mar Miriam vrag of ik achterum wil kommen en nemp mij metien met naor heur volledig ingericht tuunhoes. Dit is de plek, waor ze veul vanoet hoes warkt as ZZP’er en bedrieven adviseert over medezeggenschap en OR-aangelegenheden.
Zuver Drents en weerum naor de roots
Heur Drents is niet zuver. Ze is opgruit in Tienaorl, mar ze is er niet geboren. Mar daordeur vuult ze zich wal een Drent. Ze prat Drents, deurspekt met Nederlands. “Mar”, zo vertelt ze “in Tienaorl is het een mengelmoes van Grunnings en Drents. En zo is het bij het lezen van teksten ok wal ies: is het now hoes of zeg wij huus”.
Tot heur negentiende hef ze in Drenthe woont en is toen verhoesd naor Rotterdam veur de studie. Wat ze niet meer verget is de oetspraok van een wichtie achter de kassa: “Goj naor ’t boetenlaand?”. Rotterdam was jao boetenlaand!! Daor hef ze dan vief jaor woond en toen is ze naor Den Haag verhoesd waor ze 23 jaor woont hef. Daordeur was ze om zo te zeggen, hielemaol verwesterd. Toch is ze weer naor Drenthe gaon met heur gezin. Miriam: “ik was ’t hielemaol zat daor. Ik wol weerum naar hoes”. Ze zeg het met een lach. Er was veul drokte, agressie en dan die files. Dat weur allemaol een beetie teveul, dus dacht ze: vort wezen. Vier jaor leden, streken ze neer in Schonnerd. Ze zöchten een darp met winkels en wat reuring.
En toen dacht ik dat is het
Hoe zat dat dan met heur muzikale carrière um zo te zeggen? “t Is al begunt op de basisschoel”, vertelt Miriam, “met de musical van groep 8. En dan was er ok nog de playbackshow. Met een paar meiden hew de Dolly Dots daon en dat hew toen wunnen en muchten wij naar regionale finale en daor weuren wij twiede of zoiets”. “En toen dacht ik , dit is ‘t, dit moek doen”. Op de middelbare schoel is ze bij de schoelband gaon. Nao de schoeltied is ze op zuuk gaon naor een band. Dat weur de ‘Trade Winds’ oet Assen. Ze hebt daormet een pries wunnen en kunnen optreden in de studio van Normaal. En gien covers mar met eigen wark! Nao de verhoezing naor Rotterdam, kwam ze terecht bij een zusterband van de Hermes House band. “Toen hek hiel veul optreden en deur ’t hiele laand, dat was echt een hiele mooie tied”, zo vertelt Miriam enthousiast. Ze hef samen met twie aandere jongs een stuk schreven dat het: “Promised Land”, en dat is oetbracht deur DJ Paul Elstak. De leste 10 jaor in Den Haag zat ze in echte discobands. En toen ze weer verhoesd was naor Drenthe, dacht ze: “Hee, dat möt Drenthe ok kriegen, een echte discoband. Toen hek een echte discoband opzet en dat weur de Disco Dance Department”. De band hef ze zölf opricht met twie jongs oet Assen waor ze eerder met speult har. Miriam glundert: “het is fantastisch – en op koningsdag staon we in Emmen!”. Disco Dance Department bestiet oet 10 personen en Miriam is ien van de leadzangeressen. Het is hiel professioneel opzet met glitter, show en dansies. “Echte dikke disco”, zeg Miriam.
En toen kwam de Vlinderprinses
Vanoet de kindertied hef ze al een liefde veur theater en musicals. In 2022 hef ze veur het eerst metdaon an een musical in Coevern. Het scheelde dat ze al podiumervaring opdaon har met heur band. Ze zag een oproep in de Coeverder kraant van ene Dick. En ze dacht bij zöchzulf, ik gao wal even hen. Miriam: “ik heb gewoon mien ding daon en toen starten die repetities en toen bleek dat er ok nog professionele acteurs an met deuden, hielemaol oet Amsterdam!”. Miriam schatert as ze vertelt: “Die ene Dick zee mij niks, ik dacht meer aan de plaotselijke Dick oet Coevern”. Miriam zingt nog even een regel oet de musical en lat heuren dat zingen echt heur ding is. Ja en dat smaakte naor meer en toen kwam de “Vlinderprinses”. In eerste instantie was er gien rol veur heur mar allent metzingen in ’t ensemble. Ze vertelt van heur auditie waorbei ze op de taofel is gaon staon en wilde dingen daon hef. Op zeker moment kwam de rol vrij van Martje, de schoeljuf. Dat paste heur wal. Zo zingt ze in de veurstelling ok een solo, een duet met Martije en misschien nog een aandere solo. Dus Vanoet het hart, met Martije samen en dan misschien de Vlindergiest en dan ok nog Vlinder met Martije en Ellen. “de rol is superleuk”, vertelt Miriam, “en ik mag een beetie gek doen en an het eind de boel dirigeren enzo”. Een beetie deur het hiele veld hen huppelen. Lachend zeg ze: “Volgend jaor nog weer een grotere rol als het kan, zo bouwt wij het een beetie op”.
Een doezendpoot en kom mar deur
Op dit moment speult ze nog met in de veurstelling ‘Nors Staal’ in een kerk in Sappemeer, waorbei ze zingt en danst in het ensemble. Verder hef ze een gezin met een man en drie jongs (19, 17 en 10 jaor). Heur man is van beroep bevelvoerder bei de brandweer in Den Haag en dat betiekent dat e um de drie dagen vort is. Miriam möt daordeur alles allent doen in hoes: jongs naor de voetbal, eten koken, de was, het hoes an kaant en heur wark as ZZP’er. Tiendoezend dingen tegeliek. En dan nog alle dingen d’r naost zoas met de band. Bovendien is ze ok nog manager van de band wat inholdt dat ze zorgt veur alle boekingen, de contracten en zo meer. “ja ik heb het hartstikke drok, ik ben een doezendpoot”, vult ze aan. En wat nao de Vlinderprinses? “Ik blief kieken naor wat er veurbei komp. Kom mar deur. Ik stao er veur open.” Miriam nuumt zuchzölf extravert en een rasoptimist, bei heur bint de spreekwoordelijke glazen altied vol.
Tekst en foto: Gienus Woldring