Harry Dorgelo (De Krim, 1959) is eigenaar van Dorgelo Audio Service oet Emmen en verantwoordelijk veur de licht-, geluud- en videotechniek bij de Vlinderprinses.
Talent is een belangriek woord
Waor is dat begunt met de licht- en geluudstechniek, vraog ik Harry. “Op mien twaalfde op de HAVO was der een jong die har een mooi boekien over elektronica. Dat leek mij wal leuk en toen bin’k an ’t strunen gaon en gaon neuzelen. Ik vun dat wal leuk”. Mar hej dan ok een opleiding daon in die richting van de techniek? “Ja”, zeg Harry, “deels niet ofmaakt. Wel ofmaakt MTS, mar de HTS vun ik wal leuk mar op een bepaold moment har ik zoiets van: ik wil an ’t wark en dat studeren, nou ja oké”. Hij hef nog een poosie Laboratoriumschoel want hij wol eigenlijk medisch-technisch specialist worden. “Want dat leek mij ook nog zinnig”, zo vertelt Harry, “’t is niet hielemaol lukt, want op ’n bepaold moment kröp het bloed waor het niet gaon kan”. Dus dit kwam er oeteindelijk oet. Mar het is een hiele ontwikkeling west.
Harry legt oet wat e bedoelt: “Je gaot op een bepaold moment met gospelgroepies en wat bandties op stap. Je warkt bij een hifi-zaak, dus die technische ondergrond die wordt er aorig netties inplaveid en ok nog bij ‘n AV-bedrief met wat geluud- en cameradinger bezig. En zo heb ik mien talenten een beetien ontwikkeld”. Talent is een belangriek woord veur hum. En waorum? “Daor kuj wat met”, zeg Harry, “dat giet vanzölf. Het klinkt raor, mar daor huuj gien muite veur doen”. Die ontwikkeling is steeds voed deur neie prikkels van wark, van interesses en van meugelijkheden in de techniek. “Je moet bedenken”, zeg Harry, “wij praot hier wal over 35, 40 jaor leden”. Zolang zit e al in dit wark.
De fascinatie
Harry hef eerst warkt in loondienst bij Musifoon. Op zeker moment wol e wal veur zuchzölf begunnen op het gebied van geluud. Waor kwam die fascinatie veur licht- en geluud dan vandaon? “Das een goeie”, zeg Harry, “daor heb ik nooit over naodacht, da’s gewoon ontwikkeld, zo van het gevuul veur techniek”. Dee je va dat ook al? Harry: “nee jong, hielemaol niet. Stroom, hij zeg ik weet hoe’k een lampie an moet sluten, mar dan holdt ’t op. Mar wel techniek met holt. Mien pa was meubelmaker, stoffeerder, ook in loondienst. Wel technisch mar niet op dit gebied. Dus het is eigenlijk kommen deur die jong die naost mij zat in de eerste klas van de HAVO, die met dat boekien kwam”.
Spannend
Wat is veur je de grootste oetdaging bij zun project as dit: openluchttheater ‘De Vlinderprinses’? Harry: “de allergrootste oetdaging is om met bijna 70 zenders het geluud goed te kriegen. Da’s gewoon spannend, umdat al die dingen goed moeten warken. Ze doet heur wark wal, mar de combinatie der van. Het punt is: het is een groot terrein en je moet een groot bereik hebben. Je kunt met ’n zender niet eindeloos ver weglopen zoas met ’n tillefoon. De dekking daorvan möt goed weden. En dan een fanfareorkest der bij. We hebt 120 kanalen geluud! Da’s een leuke oetdaging en dat möt in een paar dagen staon”.
Dit is in umvang best een grote klus. Harry verklaort: “Dit is host net zo groot as een musical die ik een keer in ’t westen van ’t land daon heb, een paar jaor leden. Dit komp er met overien”. De Vlinderprinses is veur Harry en zien team een soort megaproject. Harry vertelt verder: “Wij hebt ok veul meer veurbereiding daon in de anloop der naor toe, zoas programmeren van de mengtaofels, zowel veur alle zenders as veur de meziek. Aans kan het niet. En dan bint er nog allerlei finesse dingen: der möt materiaal optimaliseerd worden, der mus wat nei anschaft worden. Je hebt grote ofstanden, dus der mus met bekabeling wat gebeuren. Mar je bouwt op ervaring en je prebeert wat oet. Je bint een poos an ’t naodenken en zo kuj al die kennis en ervaring oetstallen”.
Tiedens de veurstelling
Hoe groot is je team straks? “Wij bint straks met een man of 4, 5”. Hef iederien een vaste taak? “Ja, dat begunt bij Ruben, de zendertechnicus, Evelien Logtenberg döt de cues bij mij, die leest en drukt op ’t knoppie veur de volgende cue en ik luster en corrigeer. Dat kuj allemaol niet allien doen: lustern, cuen, anpassen en opslaon. Dan is mien dochter der nog bij en Jari veur allerlei technische understeuning. Bart is vraogd veur ’t licht. Wij hebt al veul dingen samen daon en dat lop gewoon lekker. Bart wet wat e wil en wat e doen möt. Dan hej een team en die mèensen daor kuj van op an. Ze weet wat ze moet doen en hoe en dan löp het gewoon”.
Gien ja maar
Het warkgebied van Harry strekt zöch oet naar de previncies Friesland, Grönning en Drenthe, met een oetschieter naor ’t westen van ’t land en ‘ein bisschen über die Grenze, veur het Neijaorsconcert en de Klassik Nacht in Haren, Duutsland. Wat bint de leukste klussen? Zunder naodenken zeg Harry: “Ja dit soort dingen, in ’t algemien vin ik musicals mooi um te doen. Hiel vaak bint dat de geconditioneerde dingen in theaters, waarbij ik dan allien het geluud doe. Veur mij is de regisseur heilig: wat de regisseur zeg, dat gebeurt tenzij het onmeugelijk is. De regisseur maakt oet wat er gebeurt. Ik gao niet lopen van: ja maar. Dat doe’k niet” Harry legt het oet: “Ik zeg of ik vin het een goed idee of dit lukt niet. Je moet dat respect hebben veur mekaar want aans buw allemaol regisseurties. Er moet ien weden die een visie hef en met het geluud is dat al net zo”. Harry maakt zelden met dat der commentaar op is. Dat is gien opscheppen volgens hum, mar dat komp deur een goeie veurbereiding. “En aj dan een leuke club hebt, löp het gewoon”.
Het kan niet gek genog
Wat is now het grootste compliment waj kunt kriegen? “Dat de mèensen bliede binten zegt wij hebt geneuten, wij hebt het goed kunnen verstaon. Verder doe ik gewoon mien wark, ik doe leuke dingen, vin het plezierig en het kan me niet gek genog gaon. Daor krieg ik energie van”.
En waor hoop ie op, wat zuj nog graag een keer willen maken? “Ik heb gekscherend wal ies een keer zegt”, zo vertelt Harry, “ik zul bij Van den Ende wal ies een keer een musical willen doen. Want volgens mij kan dat wal beter. Ja, daor wordt zo non en dan beheurlijk wat ofprutst. Misschien umdat ze te vaak hetzölfde klussien doet, dan wordt het ’n gewoonte en dan worden de kanties een beetien rafelig. Dan snapt iederien wal wat ik bedoel”. Wat is je volgende project? Harry: “een musical in Hardenberg van VAKK oet Dedemsvaort. Dat doe’k al 18 jaor. Deur ’t jaor hen, kan ik ongeveer angeven wat er komp. Dat is mien basis en daortussen gebeurt der van alles en nog wat. En dat is ok een stark punt van mij dat ik met dingen gao schoeven um zoveel meugelijk mèensen preberen te helpen. Dat soort combineren lukt mij aorig goed en je moet goed met de tied umgaon. Goed timen en goed beslagen ten ies kommen. Dat gef jezölf ok een rustig gevuul.
Tekst: Gienus Woldring
Foto: Henk Siepel