Het is een beetie as schilderen, een beetie meer van dit, meer van dat of een aander kleurtie der op. Bart Kruimink (1984) giet over het geluud bij de rippetities en tiedens de veurstelling over de lichttechniek bij de Vlinderprinses.
Alles dreit um meziek
Bart is opgruid in een muzikaal gezin. Zien va, Jan Kruimink is natuurlijk de componist van alle muziek bij de Vlinderprinses en de dirigent van het koor bij de Vlinderprinses. Bart kan niet zeggen wat zien vrogste herinnering is an meziek. “Want alles was aaltied meziek zowel bij mien va as bij mien moe. En bij oes dus ok”, vertelt Bart. Hij is hiel vrog bij Excelsior begund. En tot op heden nog aaltied lid van Excelsior, mar hij speult niet meer. Alles dreit eigenlijk aaltied um meziek. Bart is de oldste oet ’n gezin met veer kinder. De jongste is zien zus Hilde en zij verlient heur metwarking as violiste an de Vlinderprinses. Zien breurs Thijs en Geert hebt beide wal een instrument bespeuld, mar bint niet meer zo muzikaal actief.
Bart is naor ’t conservatorium west veur de klassieke opleiding trompet. “Ok ofmaakt en toen ik bezig was met ofstuderen, toen wus ik al dat ik er beroepsmaotig niet in verder wol, niet as trompettist. Het lot van de gemiddelde beroepsmuzikant is daj moet lesgeven en dat motiveert mij niet”. Een veurdiel van zien studie was dat e in die tied veul hef kunnen lesgeven en hij har leerlingen op allerlei niveaus. Bart: “mar hiel vaak moet kinder van heur va en moe, mar bint zölf niet gemotiveerd um der wat veur te doen. Hiel veul mezieklessen warkt vanoet het protocol: je moet een etude speulen, een toonladder of een solowark. Weet je, meziekmaken is leuk, mar dat moej ok leuk kunnen doen. Ik kun dat niet vinden in mezieklessen”.
Op zuuk naor een neie oetdaging
Een dag nao zien ofstuderen zat e bij de gemiente Coevern. Hij wol an ’t wark in de jeugdzorg. Nao een umschoelingstraject kun e an de slag as begeleider op een pedagogisch opvangcentrum. Nao het faillissement bij dizze instantie is e in 2014 bij toeval an ’t wark kommen bij Harry Dorgelo van Dorgelo Audio Services as allround metwarker. In 2018 kun e weer as persoonlijk begeleider intensieve zörg an de slag bij Cosis.
Wat trekt je now zo an in de zörg? Bart: “Warken met mèensen mar ok dat ik aaltied wal plekken heb kregen waor ik mien eigen creativiteit kwiet kun”. Hoe? “Ik huufde niet te doen wat ’n aander bedacht har. Meziek is ook een uuting van creativiteit”. Hij zit now op een plek waorbij e de ruumte kreg en zien creatieve ei wal kwiet kan en de vraog is: Wat vrag de cliënt, wat vrag de locatie en wat vrag een team. “Ja, je moet in de zörg steeds meer een begeleider weden, een understeuner van het leven, zodat de cliënt het leven kan overzien. Het is gewoon kieken wat is ien neudig, en dat bint puzzels”. Bart zeg: “as de kop vol zit met prikkels, kuj der niet nog meer in stoppen”.
Musical Art – De Kunst van muziek
Naost zien heufdbaan is e ok licht- en geluudstechnicus met een eigen underneming Musical Art. Waor bi’j dan met bezig? “Goeie vraog”, zeg Bart, “ik bin mien eigen bedrief begund umdat ik wat ruumte wol kriegen. Daorum bin ik veurig jaor ok stopt met speulen bij Excelsior. Ik dee al wat klussies geluudstechniek. Bij Harry dee ik meer de lichttechniek, mar ik kreeg meer vraogen of ik wat met geluud wol doen en ik wol mij wal wat meer ontwikkelen naor de creatieve kant”. As e daorin een wat ondersteunende rol kan kriegen dan vindt e dat mooi.
“Ik bin mien eigen bedrief ok begunt” zo vervolgt Bart, “Um mij wat meer te ontwikkelen as oetvoerend musicus of artistiek understeuner. Ondertussen bin ik ok an ’t stappen zetten hoe ik meer an ’t dirigeren kom.” En dan enthousiast wieder: “ik heb meziek schreven under aandere veur mien va. Ik heb mien va ok adviseert hoe e het ien en aander met de meziek möt anvliegen. Met name in de vörming van het orkest en wat kuj der bij vraogen. Hij hef der een visie op mar ik heb der ok wal een visie op”. Bart legt oet: “alle meziek wordt oetverstarkt en je kunt hiele complexe keuzes maken en mien va is hiel arg gericht op hoe speult het orkest zölf en hoe moew dat in balans kriegen, mar umdat de umvang van het teniel neudzaakt um het orkest te moeten verstarken dan gef dat een hiel aandere ruumte veur het orkest en de componist um met meziek um te gaon. Waor aans 20 violen neudig bint, hej misschien non wal an 1 genog. En wat döt dat met de klankkleur enzo. Mar daor heb wij dan discussies over en gaondeweg ontstiet er wat”.
Interessante keuzes
Bart hef een briede rol kregen in dit project en hef ok het ien en aander an meziek schreven veur dit project. Bij het lied van de dörsmesien hef Bart met zien va stevig metdacht. Het is artistiek een interessante keuze um muziek voor koor, orkest en dörsmesien te maken. “Toen zee ik: Pa, mag ik daor met an ’t puzzelen want het is technisch een risico. Want der zit een wezenlijk verschil in tempo in. Want zie hadden ok nog ’n keer de pulli anpast. En wat now as het tempo dan niet klopt daor op locatie dan heb jij met je composities een probleem”.
Bart kom nog meer op dreef as e vertelt: “wij gaot de compositie zo anpassen, wij gaot de dörsmesien verstarken zodat wij de dörsmesien van die ofstand op de luudsprekers pal veur de tribune kunt laoten klinken. Asof de dörsmesien veur de tribune stiet, zodaj hum in het tenielbield betrekt. Mar as ’t niet warkt, dan zet ik ‘m oet. De mesien dreit wal en de mèensen bint wal bezig. De compositie van mien va he’k verder oetwarkt en ik heb de intro der veur an schreven, waorin het orkest de ruumte hef um de kadans van de dörsmesien over te nimmen. Dat begunt in ’t slagwark en daorna komp de baslijn en vervolgens een massale, orkestrale inleiding. Tegen het ende nemp het orkest en ok de dörsmesien weer of, de baslijn komp weer en dan is het on cue. Dat is op angeven van de dirigent waor aj stoppen moet. Het is een leuke puzzel en een hiele oetdaging dat het gewoon klopt en daj dat van teveuren kunt oetdokteren.
Een beetie as schilderen, een beetie van dit en van dat en soms een aander kleurtie
En hoe groot is het project in umvang? “Goeie vraog”, zeg Bart weer, “ik zit op 96 individuele lampen. Het is wat complexer deur de positionering. In dizze productie gebeurt veul in de figuratie der um hen en dat woj eigenlijk ok gewoon in bield hebben. De Vlinderprinses is met compositie komp der bij, ok een puzzeltie. De regisseur hef wensen wat e graag wil zien. En dan is ’t an mij um dat technisch in bield te brengen en op de plek gewoon te preberen. Mar overal komp een oplössing veur. Het is een beetie as schilderen, een beetie meer van dit, meer van dat en een aander kleurtie der op”.
As e kun kiezen: zul e dan meer van zien huidige beroep naor de licht- en geluudstechniek toe willen? “Ik zul mij eerder willen ontwikkelen naor de artistieke kant”, gef Bart as antwoord, “ik heb gekscherend tegen mien va zegt: aj straks niet meer kunt, nim ik je plek wal over veur de volgende Vlinderprinses. Gekscherend mar daor zit wal een diel van mien ambitie, dat zuk wal willen”. Mien ambitie zie ik liever an de ziedkaant van ’t teniel staon um de techniek an te sturen. Ik heb ok wal de ambitie um het orkest te dirigeren. Of misschien ok wal producties schrieven of wat dan ok, mar der möt wal meziek bij zitten”.
As ’t mar klopt
Bart lustert veul naor meziek. De hiele dag stiet spotify an. As ‘t mar echte muziek is, kan dat van alles weden: klassieke meziek, popmeziek, dancemeziek. Mar wal hiel veul klassieke meziek. Het is wal een beetie ofhankelijk van het moment van de dag, mar het möt echte meziek weden. Bart zeg daorover: “aj weet wat er allemaol kan met meziek en waorum, en heur ik wat ik heur, en wat speult ze eigenlijk dat hef vaak een hiel speciale reden. Dus as het mar goed opbouwd is, dan maakt de stijl niet zoveul oet. Zeker wanneer aj lustert naor de meziek van Bach, de barokmeziek die is hiel arg complex en snel. Op ’t conservatorium hew ‘Das Wohltemperierte Klavier’ van Bach analyseerd in melodische en harmonische zin en hoe e dat schreven hef en wat hef e schreven. Dan gebeurt er in 5 maten tied zo Gods gruwelijk veul, meer as wat er in een volledig popnummer gebeurt. Mar dat vin ik interessant en mooi. Net as bij Bruckner met hiele brute orkestmeziek, massief en massaal en toch klopt het”.
Veur mien va
“Ik hoop dat het een mooie voorstelling wordt en het publiek een mooie aovend hef. Ik hoop ok dat het een mooie veurstelling wordt veur mien va, met zien ziekte en hoe dat verlop. Ik hoop ok dat hij dat as een hoogtepunt kan en mag ervaren. Daor doe ik mien best veur”.
Tekst: Gienus Woldring
Foto’s: Henk Siepel en Ton Trompert