‘Alle freonen binne hjir wolkom’- een gesprek met Gerard Aalderink
(vertaalt oet het Fries: alle vrienden zijn welkom)
Gerard is geboren en getogen in Appelscha en toen e anderhalf jaor was bint ze verhoesd naor Woudsend. Zien va wuur daor rayoncommandant van de rijkspolitie. Um de zoveul tied muj verplaotsen bij de plietie en zo dus ok Gerard zien va en kwamen ze in Woudsend terecht. “Een plekkie waor gienien hen wol, mar wij hebt er een fantastische tied had. Ik heb der oeteindelijk 7,5 jaor woond. Ik heb daor leren lopen en proten. En mien vrienden waren Fries”, zo vertelt Gerard. Gerard is opgruid tussen Friese kinder en prat zölf ok wal Fries. Gerard: “Een aantal jaoren leden hew een keer een reünie had van de legere schoel daor. Een hiele dag umgaon met die Friezen die overal en nargens woont. En met mekaar de hiele dag Fries proten, want dat was oeze gezamenlijke moedertaol zeg mar. Zo vuult het wal een beetie. Toen ik de volgende dag naodat ik een beetie oetbrakt was weer hen hoes ree, betrapte ik mijzölf erop dat ik in ’t Fries begunde te denken”.
Nao 7,5 jaor Woudsend bint ze in Slien kommen wonen toen zien va plaotsvervangend groepscommandant wuur. Va en moe wollen ook geern weerum, want zie komt allebei oet Drenthe. Va en moe bint ok nooit meer weggaon oet Slien.
De appel valt niet ver van de boom
Gerard is in 1991 bij de plietie kommen. Eerst hef e in Amsterdam intern op de plietieschoel zeten. Met de stage in Delft derbij hef e daor zun twie jaor zeten. Daorna kwam e in Delft bij de plietie en daor hef e dan zun 6 jaor woond. “Ik wol wal kruupend weerum”, zeg Gerard, “Ik heb er wal een mooie tied had en veul leerd. Mar daor heerst een aandere mentaliteit as hier in ’t noorden. Het is allemaol wat drokker en een bult ikke, ikke. Op een gegeven moment was ik er wal klaor met en is het mij lukt om weerum te gaon en bin’k in Beilen terecht kommen”. Hij is in Slien gaon wonen, want daor wonen zien olders en zien vrienden.
Gerard (53) is trouwd met Gea en trotse pappe van dochter Linda. Linda is net slaagd veur heur Vwo-diploma en wil na een tussenjaor leisure- en eventmanagement gaon doen.
In 2008 hef Gerard ontslag nummen umdat zien wark wuur verplaotst naor Drachten. Daor har e gien zien an. “Ik har nog een soort van jongensdreum um vrachtwagenchauffeur te worden. Dat hek daon, ik heb de papieren haald en bin op de vrachtwagen kreupen. Mar nao een maand of veer, vief, dacht ik, wil ik dit de rest van mien leven. Ik heb toen besleuten um toch weer naor de plietie te gaon”. Gerard kwam eerst in Assen terecht en daornao in Emmen. Zien functie is die van senior intake en service veur Zuudoost Drenthe. En daor is gien woord Drents an. Wol e altied al bij de plietie? Gerard: “Mien moe zee: zolang as e kan denken, wil e al bij de plietie, dus vanof drie, veer jaor”. En deur zien va is ’t hum ok met de paplepel ingeuten.
De weduwe Joustra
Gerard hef een grote veurliefde veur Beerenburg. Hij verzamelt alles van de weduwe Joustra, van glazen en flessen tot aan koppies enzo. En zo koj dan ok vanzölf in ’t olde, kleine winkeltie in Sneek. Toen de weduwe Joustra 150 jaor bestun, kreeg Gerard een Beerenburg die 15 jaor op ’t vat legen har. Toen e daor een slokkie van nummen har, was zien reactie: “Donder, dit is wal wat aans as Beerenburg”. En zo is ’t begund. Toen Gerard 50 wuur, hef e van vrienden een fles kregen van een speciale editie. De allereerste fles van ’t vat. En toen de weduwe Joustra 160 jaor bestun wuur e beld of e veurkeur har veur een bepaold nummer (want zie kent hum daor al as trouwe ofnimmer). Dat is nummer 18 worden want ze woont ok op nummer 18. Gerard legt oet: “Weduwe Joustra is de ienige Beerenburg die rechten kregen hef van Hendrik Beerenburg oet Amsterdam, de oetvinder zeg mar. En Weduwe Joustra is de ienige die Beerenburg mag schrieven met dubbel ee”.
Veurzieningen veur De Vlinderprinses
Gerard zit in de kemissie veurzieningen samen met Ben Uneken en Willem Woppenkamp. “Het giet over een belangriek underdiel en dat is veiligheid. En dat moej wal goed wegzetten richting gemiente”, legt Gerard oet. Bij de ‘Toorn van Thunaer’ hebt ze al de neudige ervaring opdaon. Het veiligheidsplan is herschreven veur de Vlinderprinses. En waor moej an denken? “Noodweer, een bommelding, braand of harde wind bij veurbield. Ok zaken as EHBO, verkeersregelaars, looproutes allemaol dat soort dinger”. Een goeie veurbereiding is hiel belangriek.
De mannen woont dicht bij mekaar dus het overleg giet makkelk. En zie spreekt mekaar elke dunderdag bij de zang.
En van de zang naor de Vlinderprinses
Gerard zit al 25 jaor bij de zang. Hij kwam der met in aanraking deurdat e al kind an hoes was bij de femilie Klinkhamer in Slien. En toen e vanoet Delft weer naor Slien verhoesd is, is e bij de zang gaon um der weer tussen te kommen en ok nog geliek met zien moe. Gerard hef een mooie basstem. En het Drents hef e zöch as geboren Fries eigen maakt. En hie hef wat jaoren in ’t westen woond. Daor wuur hum verweten dat e de e inslikte. Gerard voegt er an toe: “zie mienden dat ze daor hartstikke Nederlands pruuten. Mar dat was niet zo. Want toen ik vruug waor woon ij dan, zeden ze van Delluf. As ik hier ankom rieden stiet er Delft en gien Delluf. Now dat was ook weer zo”. Drents hef e in hoes leert en van de femilie. “En ik kwam natuurlijk bij Klinkhamer over de vloer en met Harm Diekstra. En wij gungen samen op stap enzo”.
Gerard hef under zien ofkupping nog het vaandel hangen van Hazarman de Hellige, een prachtrol die hij vertolkte bij de ‘Toorn van Thunaer’. Hij wol eerst hielemaol niet met doen, mar hij stiet op de zang naost Harm. En ja naodat e auditie daon har kreeg e een rol as Hazarman de Hellige. “Mar je moet ok op peerd wuur der zegt. Verdikke ik har nog maar ien keer op ’n peerd zeten. En dat was niet zun succes, daor wee’k niet van”. Oeteindelijk is dat niet deurgaon en wuur het een karregie waor Gerard as roverhoofdman in stun. “En daorna zeden ze mar je moet ok ‘t water in. Ik vruug nog: is ’t now klaor? Want der komp al meer bij”, zeg Gerard hardop lachend. Gerard vuulde zöch hielemaol vergruid met die rol. “ik stun daor en ik dacht je maakt mij de pis niet lauw. Wat aj ok zegt: ik heb antwoord”. En now speult e Albert Klingenbarg, marechaussee oet Zweel. Een handig rollegie met veul stil spel, zo beschouwt Gerard zien rol in de Vlinderprinses. Veur dizze rol red e in een jeep oet 1943, die metdaon hef tiedens de bevrijding. Er doet twie jeeps met, beide identiek oet 1943. Op de jeep zit een plaatie van Ford, mar Gerard denkt dat ‘n Willys is. “En allemaol wat accessoires die ze der vrogger anknupten zit der op”, zo vertelt Gerard, “het is wat Spartaans rieden. Ik pas mar krap an achter ’t stuur. Ik heb het stuur mooi strak in de boek staan. Mar ’t is veur ’t goeie doel”, zo zeg Gerard. Het möt een beetie een spektakel worden, dus gaot ze veur de tribunes langs.
Saamhörigheid
Op de vraog wat Gerard nog geern kwiet wil, zeg e ’t volgende. “Bij de Toorn van Thunaer kwam ik Robert Braom weer tegen en daor har ik vrogger op de MAVO bij in de klas zeten, mar daorna nooit weer zien. En vanof moment ien bint wij dikke kameraoden. Wij bint alweer een paar keer met mekaar op stap west. En wij kunt het goed vinden. En de saamhörigheid die aj kriegt met de hiele klup. Het vuult as een soort femilie”. En dat is in zien ogen nog wal vermeldensweerdig.
Tekst: Gienus Woldring, Foto’s Ton Trompert